NEWS
កីឡាករ Greenwood ថាខ្លួនជំពាក់គុណ Man Utd និងចង់ធ្វើរឿងនេះតបស្នងវិញ
2024-02-27 10:02:23
លោក Jim Ratcliffe បាននិយាយថាលោកចង់ស្វែងយល់កាន់តែច្បាស់ពីករណីរបស់កីឡាករ Mason Greenwood មិនមែនតាមតែអ្នកផ្សេងនោះទេ។ កីឡាករ Mason Greenwood បានអវត្តមានក្នុងការបង្ហាញខ្លួនជាមួយក្រុម Manchester United ចាប់តាំងពីខែមករា ឆ្នាំ២០២២ ដោយសារតែរឿងក្តីមួយចំនួន។ យោងតាមសារព័ត៌មាន The Sun បានឱ្យដឹងថា កីឡាករ Mason Greenwood គ្មានបំណងផ្ទេរទៅកាន់ក្រុម Barcelona ឡើយ ប្រសិនបើក្រុម Manchester United នៅចង់បានរូបគេ ដោយកីឡាកររូបនេះប្រកាន់ជំហរថាខ្លួនជំពាក់គុណជាច្រើននៅទីនេះ។
សារព័ត៌មានជាច្រើនក៏បានចុះអំពីក្រុម Barcelona និងក្រុម Atletico Madrid ដែលចាប់អារម្មណ៍ក្នុងការចុះកុងត្រាយកកីឡាករ Mason Greenwood។ ក្រុម Manchester United ក៏ធ្លាប់បានដាក់តម្លៃខ្លួនកីឡាកររូបនេះក្នុងទឹកប្រាក់ប្រមាណ ៣៤ លានផោនដូចគ្នា ប៉ុន្តែពួកគេអាចនឹងត្រូវរងការរិះគន់ ប្រសិនបើពួកគេសម្រេចចិត្តក្នុងការលក់កីឡាកររូបនេះក្នុងតម្លៃថ្លៃ។ ចាប់តាំងពីចូលរួមជាមួយក្រុម Getafe ក្នុងលក្ខខណ្ឌខ្ចីជើងមក កីឡាករ Mason Greenwood បង្ហាញខ្លួនបានចំនួន ២៤ ដង ដោយរកគ្រាប់បាល់បាន ៧ គ្រាប់និងប៉ះឱ្យមិត្តរួមក្រុមរកគ្រាប់បាល់បាន ៥ ដង។ កំណត់ត្រានៅក្រុម Manchester United វិញ កីឡាកររូបនេះរកគ្រាប់បាល់បាន ៣៥ គ្រាប់តាមរយៈការលេង ១២៩ ប្រកួត។
គួរបញ្ជាក់ផងដែរថា កីឡាករ Mason Greenwood នឹងមានភារកិច្ចជួយក្រុម Getafe ប៉ះគ្នាជាមួយក្រុម Barcelona នាចុងសប្តាហ៍នេះ ដោយការប្រកួតនេះនឹងធ្វើឱ្យក្រុម Barcelona កាន់តែស្គាល់ច្បាស់ពីសមត្ថភាពរបស់កីឡាករ Mason Greenwood៕
Go to our Telegram Group
Go to our Facebook page